Tournament rules

KORT FORTALT - Turneringa er gratis. Du får éin startstack, utan re-entry, rebuy eller add-on. - Kvar spelar får to eigne kort. Den beste pokerhanda på fem kort vinn. - Du kan bruke begge, eitt eller ingen av holkorta saman med felleskorta. - Følg med, spel i rett rekkjefølgje og sei tydeleg «check», «bet», «call», «raise», «fold» eller «all-in». - Ver på plassen din når korta blir delte ut, vern korta og hald sjetongane synlege. - Telefon kan liggje på bordet, men skal ikkje brukast i samband med spelet eller medan du har ei levande hand. - Vi tek omsyn til nybyrjarar, men prøver samtidig å følgje korrekte pokerreglar. - Er du usikker, stopp spelet og spør kortdelaren eller turneringsleiaren. - Turneringsleiaren avgjer uklare situasjonar, og avgjerda er endeleg. - Når du er slått ut av hovudturneringa, kan du melde deg på ein gratis Sit & Go. Desse startar når det er ledig bord og nok påmelde, normalt 7–9 spelarar. Les resten av reglane for meir informasjon om spelegang, handrangering, innsatsar, minste høgning, all-in, showdown og vanlege feilsituasjonar. 1. FORMÅL OG REGELGRUNNLAG Pubpoker skal vere ei sosial, inkluderande og rettferdig pokerturnering der både nybyrjarar og erfarne spelarar kan trivast. Vi prøver å spele korrekt etter vanlege internasjonale turneringsreglar, men tek omsyn til at mange deltek for å lære og ha det kjekt. Reglane byggjer på prinsippa frå Poker Tournament Directors Association (TDA), tilpassa Pubpoker, programvarestyrt turneringsleiing og bruk av frivillige, spelande kortdelarar. Turneringsleiaren har ansvar for gjennomføringa. Avgjerda til turneringsleiaren er endeleg. I uvanlege situasjonar kan turneringsleiaren bruke skjønn og velje den løysinga som best tek vare på rettferd, spelet og den sosiale ramma. Dersom informasjonen på arrangementssida avvik frå desse reglane når det gjeld starttid, innsjekk, kapasitet, blindestruktur, premiar eller andre praktiske forhold, gjeld informasjonen for det aktuelle arrangementet. 2. DELTAKING OG TURNERINGSFORMAT Turneringa er ein gratis freezeout: - Det er ingen innsats, buy-in eller krav om kjøp for å delta. - Kvar spelar får éin startstack. - Re-entry, rebuy og add-on er ikkje tillate. - Turneringssjetongane har ingen pengeverdi og kan ikkje løysast inn, seljast eller overførast til andre. - Eventuelle premiar står oppførte på arrangementssida og blir ikkje finansierte av spelarane. - Deltakaren må vere minst 18 år og oppfylle alderskrava til utestaden. Utestaden kan krevje legitimasjon. Påmeldinga er personleg. Ein spelar kan ikkje overføre plassen sin til andre utan godkjenning frå arrangøren. Sein påmelding og spelarar frå ventelista kan sleppast inn så lenge innsjekkinga er open og det er ledig kapasitet. Dei får full startstack og plassering bestemt av turneringsprogrammet eller ved tilfeldig trekking. Ein spelar som har mista alle sjetongane sine etter at alle pottane i handa er fordelte, er slått ut av turneringa. 3. SLIK SPELAR VI NO LIMIT TEXAS HOLD’EM Det blir brukt ein vanleg kortstokk med 52 kort utan jokrar. Kvar spelar får to personlege kort med biletsida ned. Desse blir kalla holkort. Deretter blir det lagt ut inntil fem felleskort: - Floppen: tre felleskort. - Turn: eitt felleskort. - River: eitt felleskort. Det er fire innsatsrundar: 1. Før floppen. 2. Etter floppen. 3. Etter turn. 4. Etter river. Spelaren lagar den beste moglege pokerhanda med nøyaktig fem kort. Ein kan bruke: - begge holkorta, - eitt holkort, - eller ingen holkort og berre dei fem felleskorta. Det sjette og sjuande kortet blir ikkje brukt når handa skal rangerast. 4. RANGERING AV POKERHENDER Frå høgast til lågast: 1. Straight flush Fem kort i rekkjefølgje og same sort. Royal flush er den høgaste moglege straight flushen: ti, knekt, dame, konge og ess i same sort. 2. Fire like Fire kort med same verdi. 3. Fullt hus Tre like og eitt par. 4. Flush Fem kort i same sort som ikkje dannar ein straight. 5. Straight Fem kort i rekkjefølgje, men ikkje alle i same sort. 6. Tre like Tre kort med same verdi. 7. To par To ulike par. 8. Eitt par To kort med same verdi. 9. Høgaste kort Når ingen har ei av hendene ovanfor. Esset kan vere høgt eller lågt i ein straight. A-2-3-4-5 er den lågaste straighten. Esset kan ikkje liggje midt i ein straight, så K-A-2-3-4 er ikkje ein straight. Kortsortane spar, hjarter, ruter og kløver har lik verdi. Sort blir aldri brukt til å kåre ein vinnar. 5. DEALERKNAPP, BLINDAR OG SPELREKKEFØLGJE Dealerknappen viser den nominelle dealerposisjonen og flyttar med klokka etter kvar hand. Den frivillige spelaren som fysisk deler ut korta, er ikkje nødvendigvis spelaren med dealerknappen. Spelaren til venstre for dealerknappen legg small blind. Den neste spelaren legg big blind. Eventuell ante følgjer blindestrukturen som blir vist på turneringsskjermen. Før floppen startar handlinga hos den første aktive spelaren til venstre for big blind. Etter floppen startar handlinga hos den første aktive spelaren til venstre for dealerknappen. Når det berre er to spelarar igjen: - Dealerknappen er small blind. - Dealerknappen handlar først før floppen. - Dealerknappen handlar sist etter floppen. Blindar og ante blir lagde i potten sjølv om spelaren ikkje er på plassen sin. Når klokka annonserer eit nytt nivå, gjeld dei nye blindane frå neste hand. Ei ny hand byrjar ved den første stokkinga som høyrer til den nye handa, eller når kortdelaren startar utdelinga dersom kortstokken allereie er ferdig stokka. 6. HANDLINGAR OG INNSATSAR Bruk tydelege uttrykk når du spelar: - Check: stå over utan å satse når ingen har satsa før deg. - Bet: gjere den første innsatsen i runden. - Call: syne den gjeldande innsatsen. - Raise: høgne den gjeldande innsatsen. - Fold: kaste korta og gi opp potten. - All-in: satse alle sjetongane dine. Munnlege erklæringar som blir gjorde når det er spelaren sin tur, er bindande. Har du sagt «call», «raise», «fold» eller «all-in», kan du normalt ikkje ombestemme deg. Dersom ein spelar både seier noko og flyttar sjetongar, er den handlinga som kjem først, avgjerande. Dersom dette skjer samtidig, vil ei tydeleg munnleg erklæring normalt ha prioritet. Handlingar skal gjerast i rett rekkjefølgje. Vent til handlinga før deg er ferdig og innsatsen er tydeleg før du handlar. Handling utanfor tur kan bli bindande dersom handlinga fram til spelaren ikkje endrar seg. Fold utanfor tur er normalt bindande. Gjentekne handlingar utanfor tur kan gi åtvaring eller straff. Sjetongar som blir satsa, skal leggjast tydeleg framfor spelaren i éi rørsle. Ikkje kast sjetongane rett inn i potten. Ein string bet eller string raise er ikkje tillaten. Det betyr at spelaren ikkje kan leggje ut delar av innsatsen, gå tilbake til eigen stack og deretter leggje ut meir utan først å ha sagt «raise». For å unngå misforståingar bør spelaren seie «raise» og totalbeløpet før sjetongane blir flytta. 7. REGLAR FOR BET OG RAISE I No Limit Texas Hold’em kan ein spelar satse opptil alle sjetongane sine. Den minste opningsinnsatsen er normalt lik big blind. Ei høgning må vere minst like stor som den største fullførte innsatsen eller høgninga tidlegare i den same innsatsrunden. Det er storleiken på sjølve høgninga som tel, ikkje berre totalbeløpet. Det er inga øvre grense for kor mange gonger det kan høgnast i ei innsatsrunde. Dersom ein spelar utan å seie «raise» legg ut fleire sjetongar som når minst 50 prosent av ei minste lovleg høgning, men mindre enn ei full høgning, må spelaren normalt fullføre til minste lovlege høgning. Dette gjeld når ikkje alle sjetongane er nødvendige for å syne, og spelaren har sjetongar igjen. Dersom beløpet er mindre enn 50 prosent av ei minste høgning, blir handlinga normalt rekna som call, med mindre spelaren sa «raise» først eller spelaren er all-in. Når ein spelar møter ein innsats og legg ut éin enkelt sjetong med større verdi enn det som trengst, blir dette rekna som call dersom spelaren ikkje sa «raise» før sjetongen trefte bordet. Dersom ingen har satsa, blir ein enkelt sjetong som blir lagd ut utan munnleg erklæring, rekna som ein innsats på heile verdien til sjetongen. Dersom ein spelar legg ut alle dei siste sjetongane sine, kan handlinga vere all-in sjølv om beløpet ikkje utgjer ei full høgning. Ved uklare innsatsar avgjer turneringsleiaren kva handling som gjeld. 8. ALL-IN OG SIDE-POTTAR Ein spelar er all-in når alle sjetongane til spelaren er satsa. Ein spelar kan berre vinne den delen av potten som spelaren sjølv har vore med på å byggje. Dersom andre spelarar satsar meir, blir det oppretta éin eller fleire side-pottar. Kvar pott blir avgjord separat. Når ein eller fleire spelarar er all-in og ingen aktive spelarar kan satse meir, skal alle aktive hender visast med biletsida opp før resten av felleskorta blir delte ut. Ei all-in-høgning som er mindre enn ei full lovleg høgning, opnar normalt ikkje innsatsen på nytt for spelarar som allereie har handla og ikkje møter minst ei full høgning når handlinga kjem tilbake. Spelarar som enno ikkje har handla, har framleis dei vanlege alternativa. Fleire korte all-in-høgningar kan samla utgjere ei full høgning og opne innsatsen på nytt. Ved fleire korte all-in-høgningar skal kortdelaren stoppe og tilkalle turneringsleiaren dersom det er uklart om innsatsen er opna på nytt. 9. SHOWDOWN OG FORDELING AV POTTEN Ved showdown er det korta som avgjer. Ei munnleg skildring av handa er ikkje bindande. Ved showdown med to eller fleire levande hender må ein spelar leggje begge holkorta med biletsida opp for å kunne vinne potten. Dette gjeld òg dersom spelaren bruker alle fem felleskorta. Dersom alle andre spelarar kastar korta sine med biletsida ned, vinn den siste spelaren med levande kort utan å måtte vise handa. Når ein spelar er all-in og all vidare innsats er ferdig, skal alle aktive hender leggjast opne. Dersom ingen viser frivillig: - Spelaren som gjorde den siste innsatsen eller høgninga på river, viser først. - Dersom alle checka på river, viser den første aktive spelaren til venstre for dealerknappen først. Når kort er kasta uidentifiserbart i mucken, mistar spelaren normalt retten til potten. Kortdelaren og spelarane skal seie frå dersom ei open hand er lesen feil. Ei korrekt framlagd vinnarhand skal ikkje kastast eller bli erklært død ved ein rein feil. Dersom to eller fleire spelarar har nøyaktig same beste femkortshand, blir potten delt likt. Ein eventuell oddesjetong går til den første vinnande spelaren til venstre for dealerknappen. 10. SPELAREN SITT ANSVAR Kvar spelar har ansvar for å: - Følgje med på handlinga. - Handle i rett rekkjefølgje. - Gjere innsatsen sin tydeleg. - Kontrollere at ein har fått rett tal kort. - Verne korta mot å bli tekne av kortdelaren eller blanda med andre kort. - Halde kort og sjetongar synlege. - Seie frå dersom dealerknappen, blindane, potten eller ei open hand ser ut til å vere feil. - Spele i eit rimeleg tempo. - Flytte raskt når turneringsleiaren balanserer eller bryt bord. - Følgje beskjedane frå kortdelaren og turneringsleiaren. Sjetongar skal stå i ryddige og teljande stackar. Høgare valørar skal vere godt synlege og ikkje gøymast bak lågare valørar. Stackar på rundt 20 sjetongar med same valør er anbefalt. Kort frå andre kortstokkar og sjetongar som ikkje høyrer til turneringa, er ikkje tillatne. 11. FRIVILLIGE, SPELANDE KORTDELARAR Pubpoker bruker frivillige kortdelarar som også deltek i turneringa. Den spelande kortdelaren skal: - Dele korta i rett rekkjefølgje. - Styre handlinga rundt bordet. - Annonsere bet, raise og all-in når det er nyttig. - Halde hovudpotten og eventuelle side-pottar skilde. - Passe på dealerknappen, blindane og felleskorta. - Stoppe spelet og tilkalle turneringsleiaren når noko er uklart. Kortdelaren kan ikkje avgjere ein tvist som gjeld eiga hand eller eiga handling. Då skal spelet stoppast og turneringsleiaren tilkallast. Alle spelarane ved bordet deler ansvaret for at handling, sjetongar, kort og pottar blir handterte korrekt. Kortdelarrolla fritar ikkje dei andre spelarane frå å følgje med. 12. FEIL VED UTDELING ELLER FELLESKORT Ingen skal prøve å rette ein større dealerfeil på eiga hand. Stopp handlinga og tilkall turneringsleiaren. Ein misdeal kan mellom anna liggje føre dersom: - Det første kortet blir delt til feil plass. - Ein aktiv spelar ikkje får kort. - Kort blir delte til ein plass som ikkje skal ha kort. - Ein spelar får feil tal holkort. - Eitt av dei to første korta frå kortstokken blir eksponert ved ein dealerfeil. - To eller fleire andre holkort blir eksponerte under den første utdelinga. Eitt enkelt kort som blir eksponert seinare i utdelinga, fører ikkje nødvendigvis til misdeal. Kortdelaren skal stoppe og få avgjerda stadfesta av turneringsleiaren. Når vesentleg handling har skjedd, kan handa normalt ikkje erklærast som misdeal. Vesentleg handling betyr anten: - to handlingar i rett rekkjefølgje der minst éi handling legg sjetongar i potten, eller - tre handlingar i rett rekkjefølgje, til dømes check, bet, call, raise eller fold. Blindar og ante som er lagde ut før korta blir delte, tel ikkje som handlingar i denne vurderinga. Feil flop, manglande brennkort eller kort som blir delte ut for tidleg, skal ikkje rettast ved at spelarane sjølve blandar eller vel kort. Turneringsleiaren avgjer framgangsmåten. 13. Å VERE PÅ PLASSEN SIN For å ha ei levande hand må spelaren vere innan rekkjevidd av stolen sin når det siste holkortet i den første utdelinga er delt til alle spelarane. Dersom spelaren ikkje er på plass, blir handa kasta utan at spelaren får sjå korta. Blindar og ante blir ståande i potten. Ein spelar med ei levande hand skal bli ved bordet gjennom alle innsatsrundane og showdown. Ein spelar som går frå bordet medan handa framleis er levande, kan få åtvaring eller straff. Ein fråverande spelar blir blinda og eventuelt anta ut av turneringa så lenge stacken står i spel. 14. SPELETEMPO OG KLOKKE Spelarane skal handle innan rimeleg tid. Det er lov å tenkje i vanskelege situasjonar, men medviten eller gjenteken tidsbruk for å forseinke spelet er ikkje tillaten. Når ein spelar har fått rimeleg tid, kan ein spelar ved bordet eller kortdelaren be turneringsleiaren om klokke. Turneringsleiaren kan gi spelaren inntil 25 sekund og deretter ei avsluttande nedteljing på fem sekund. Tida kan tilpassast situasjonen. Dersom tida går ut: - Handa er død dersom spelaren møter ein innsats. - Handlinga blir check dersom spelaren ikkje møter ein innsats. 15. BORDPLASSERING, BALANSERING OG FINALEBORD Startplassane blir fordelte av turneringsprogrammet eller ved tilfeldig trekking, med praktiske unntak for frivillige kortdelarar. Bordbalansering og flytting av spelarar blir fortrinnsvis bestemt av turneringsprogrammet og algoritmane i programmet. Turneringsleiaren følgjer normalt forslaga frå programmet, men kan overstyre dei når det er nødvendig av omsyn til kortdelarar, praktisk gjennomføring, tekniske feil eller rettferdig balanse. Dersom programmet ikkje kan brukast eller ikkje gir eit eigna forslag, gjeld denne reserveløysinga: - Ved vanleg bordbalansering blir spelaren som skal ha big blind neste gong, flytta til den dårlegaste ledige posisjonen ved bordet med færrast spelarar. - Den nye posisjonen kan vere big blind, men skal aldri vere small blind. - Spelaren kan måtte betale big blind to gonger tett etter kvarandre. - Turneringsleiaren avgjer kva bord det skal flyttast frå når fleire alternativ er moglege. Spelarar frå eit brote bord og nye spelarar får plass bestemt av programmet eller ved tilfeldig trekking. Dei kan få small blind, big blind eller dealerknappen, men får ikkje kort dersom den nye plassen ligg mellom small blind og dealerknappen. Spelaren skal flytte med alle sjetongane synlege og bruke rack dersom det er tilgjengeleg. Ved ni spelarar igjen blir det normalt sett opp eit finalebord. Turneringsleiaren stoppar klokka, fordeler nye plassar ved hjelp av programmet eller tilfeldig trekking og gir beskjed om når spelet startar igjen. 16. FARGEBYTE OG FJERNING AV SMÅ SJETONGAR Når ein sjetongvalør går ut av bruk, blir sjetongane veksla inn til større valørar. Pubpoker bruker følgjande husregel: - Den samla verdien av valøren som skal fjernast, blir rekna ut for kvar spelar. - Heile beløp blir veksla til korrekt verdi. - Ein eventuell rest blir runda opp til den minste valøren som framleis er i spel. - Ingen spelar kan bli slått ut som følgje av eit fargebyte. Døme: Når 100-sjetongane skal fjernast og 500 er den minste valøren som står att, blir 1 200 i små sjetongar veksla til 1 500. Turneringsleiaren kan gjennomføre fargebyte ved borda og veksle sjetongar hos store stackar undervegs for å halde spelet ryddig. Dette er ein eigen Pubpoker-husregel og avvik frå vanleg TDA chip race. 17. TELEFONAR OG ELEKTRONISKE HJELPEMIDDEL Telefonar og andre små elektroniske einingar kan liggje på bordet så lenge dei ikkje dekkjer kort eller sjetongar, er i vegen for kortdelaren eller forstyrrar spelet. Ein spelar kan bruke telefonen mellom hender eller etter å ha kasta korta sine, så lenge bruken ikkje forseinkar eller forstyrrar spelet. Ein spelar med levande hand skal ikkje bruke telefon, smartklokke eller andre elektroniske kommunikasjonsmiddel. Dersom bruk er nødvendig, skal spelaren vente til handa er ferdig eller gå vekk frå bordet etter å ha kasta korta. Telefonar, appar, pokertabellar, kalkulatorar, KI-verktøy og andre elektroniske hjelpemiddel skal aldri brukast til å: - Få råd om ei hand. - Rekne ut odds eller innsatsar under spelet. - Søkje etter pokerstrategi. - Dele eller få informasjon om kort eller handlingar. - Kommunisere med andre om spelet medan ei hand går føre seg. Brot på reglane skal normalt føre til rettleiing eller åtvaring første gong. Gjentekne eller alvorlege brot kan gi straff. Handa blir ikkje automatisk død, men turneringsleiaren avgjer reaksjonen ut frå situasjonen. Lyd, video og annan telefonbruk må ikkje forstyrre spelet, utestaden eller andre gjester. 18. ÉIN SPELAR PER HAND Kvar spelar skal ta alle avgjerder om si eiga hand utan hjelp. Det er ikkje tillate å: - Gi eller ta imot råd medan ei hand går føre seg. - Diskutere innhaldet i ei levande eller kasta hand. - Vise korta til ein annan spelar eller tilskodar medan handling står att. - Lese eller analysere ei hand som ikkje er lagd ope på bordet. - Samarbeide om å halde andre spelarar ute av ein pott. - Spele unormalt forsiktig mot ein bestemt spelar. - Avtale handlingar, dele informasjon eller jukse. Dette gjeld også spelarar som allereie har kasta si eiga hand. Vent med analysar og kommentarar til heile handa er ferdig. 19. OPPFØRSEL OG STRAFF Vi ønskjer ei trygg og hyggeleg turnering. Vis respekt for spelarar, kortdelarar, arrangørar, tilsette og andre gjester. Trakassering, truslar, diskriminering, aggressiv åtferd, juks, samarbeid, øydelegging av utstyr eller sterkt forstyrrande rusåtferd blir ikkje akseptert. Moglege reaksjonar er: - Vennleg rettleiing. - Munnleg åtvaring. - Éi eller fleire tapte hender. - Éin eller fleire tapte rundar. - Bortvising eller diskvalifikasjon. Nybegynnarar skal normalt få ei forklaring og høve til å lære dersom feilen kan rettast utan å gi nokon ein fordel eller skade andre spelarar. Ei handling kan likevel bli ståande dersom andre alt har handla, vesentleg handling har skjedd eller spelaren har fått informasjon som gjer det urettferdig å ta handlinga tilbake. Gjentekne feil kan gi strengare reaksjon. Juks, samarbeid, truslar og grov åtferd kan gi direkte diskvalifikasjon. 20. PREMIAR, RESULTAT OG TURNERINGSSLUTT Premiar og eventuelle seriepoeng følgjer informasjonen for arrangementet. Private avtalar om å dele eller endre premiar må godkjennast av turneringsleiaren. Ei slik avtale endrar ikkje den offisielle resultatlista eller poengfordelinga med mindre arrangøren uttrykkjeleg godkjenner dette. Turneringa er ferdig når éin spelar har alle sjetongane, eller når arrangøren avsluttar turneringa etter ein på førehand kunngjord modell. Resultata som blir registrerte av turneringsleiaren, er dei offisielle resultata. OFTE STILTE SPØRSMÅL Kor mykje må eg minst høgne etter fleire høgningar? Du må minst høgne med den største fullførte innsatsen eller høgninga i den aktuelle innsatsrunden. Døme med blindar 100/200: - Spelar A høgnar frå 200 til totalt 500. Sjølve høgninga er 300. - Spelar B høgnar frå 500 til totalt 1 200. Sjølve høgninga er 700. - Dersom spelar C vil høgne, må C leggje til minst 700 og høgne til minst 1 900 totalt. Det er den største fullførte høgninga på 700 som avgjer minste høgning, ikkje totalbeløpet på 1 200. Dersom C i staden høgnar frå 1 200 til 2 000, er høgninga 800. Neste minste høgning blir då 800, til minst 2 800 totalt. Kva skjer dersom eg legg ut for lite til ei høgning? Følgjande døme føreset at spelaren legg ut beløpet med fleire sjetongar og framleis har sjetongar igjen: Ein spelar satsar 1 000. Minste lovlege høgning er 1 000 til, altså totalt 2 000. - Legg du stille ut fleire sjetongar med samla verdi på 1 500, og ikkje alle sjetongane er nødvendige for å syne, må du normalt fullføre til 2 000. - Legg du på same måte ut 1 400, er det mindre enn 50 prosent av den nødvendige høgninga. Handlinga blir normalt rekna som call på 1 000. - Éin enkelt stor sjetong er berre call dersom du ikkje seier «raise» først. - Dersom du legg ut alle dei siste sjetongane dine, er du all-in. Sei alltid «raise» før du flyttar sjetongane dersom du vil høgne. Er ein stor sjetong call eller raise? Dersom du møter ein innsats og legg ut éin enkelt sjetong med større verdi utan å seie noko, er det call. Døme: Innsatsen er 400. Du legg stille ut éin 1 000-sjetong. Dette er call på 400. Vil du høgne, må du seie «raise» før sjetongen treff bordet. Opnar ein kort all-in innsatsen på nytt? Ikkje alltid. Døme: Spelar A satsar 1 000. Spelar B går all-in for 1 400. Høgninga er berre 400 og er derfor ikkje ei full høgning. Ein spelar som allereie har handla, får normalt ikkje rett til å høgne på nytt berre på grunn av denne korte all-in-høgninga. Ein spelar som enno ikkje har handla, kan framleis høgne, men må gjere ei full lovleg høgning. Fleire korte all-in-høgningar kan samla opne innsatsen på nytt. Ved tvil skal kortdelaren tilkalle turneringsleiaren. Kan eg bruke berre felleskorta? Ja. I Texas Hold’em kan du bruke to, eitt eller ingen holkort. Dersom den beste handa di er dei fem felleskorta, «spelar du bordet». Ved showdown må du vise begge holkorta for å krevje din del av potten. Må eg vise korta dersom alle andre kastar seg? Nei. Dersom alle andre spelarar kastar korta sine med biletsida ned, vinn du potten utan å måtte vise handa. Ved all-in eller showdown der fleire levande hender konkurrerer om potten, må korta visast. Kva skjer dersom fleire har same hand? Potten blir delt dersom spelarane har nøyaktig same beste femkortshand. Berre fem kort tel. Eit sjette eller sjuande kort kan ikkje avgjere potten, og kortsortane har lik verdi. Dersom potten ikkje kan delast heilt likt, går oddesjetongen til den første vinnande spelaren til venstre for dealerknappen. Kven skal vise korta først? Spelaren som gjorde den siste innsatsen eller høgninga på river, viser først. Dersom alle checka på river, viser den første aktive spelaren til venstre for dealerknappen først. Ved all-in skal alle aktive hender visast når all vidare innsats er ferdig. Kva skjer dersom eg handlar utanfor tur? Handlinga kan bli bindande dersom handlinga fram til deg ikkje endrar seg. Fold utanfor tur er normalt bindande. Dersom handlinga endrar seg før turen kjem til deg, kan turneringsleiaren gi deg nye val. Gjentekne handlingar utanfor tur kan gi åtvaring eller straff. Kan ein nybyrjar få ta tilbake ei feil handling? Turneringsleiaren kan tillate ei retting dersom: - Feilen blir oppdaga med ein gong. - Ingen andre har handla. - Vesentleg handling ikkje har skjedd. - Spelaren ikkje har fått ny informasjon. - Rettinga ikkje gir ein urettferdig fordel. Dette er ikkje ein automatisk rett. Handlinga kan bli ståande dersom spelet har gått vidare. Kva skjer dersom eg ikkje er på plassen min? Du må vere innan rekkjevidd av stolen når det siste holkortet er delt til alle spelarane for å ha ei levande hand. Er du ikkje der, blir korta kasta, medan blindar og ante blir ståande i potten. Kva gjer vi dersom kortdelaren gjer ein feil? Stopp handlinga og tilkall turneringsleiaren. Ikkje bland kort, snu nye felleskort eller prøv å rekonstruere handa sjølv. Mange feil kan rettast dersom dei blir oppdaga tidleg. Etter vesentleg handling må handa ofte halde fram. Kan eg vise korta mine før handa er ferdig? Nei. Du skal ikkje vise eller diskutere korta dine medan handling står att. Dersom kort blir viste ved eit uhell, skal handa ikkje automatisk kastast. Kortdelaren skal stoppe handlinga og tilkalle turneringsleiaren, som avgjer om det skal givast åtvaring eller straff. Kan eg få hjelp til å velje handling? Nei. Éin spelar per hand gjeld alltid. Ingen kan gi deg råd om du bør checke, satse, syne, høgne eller kaste. Du kan spørje kortdelaren om reglane, gjeldande innsats, minste lovlege høgning eller korleis handlinga fungerer. Kortdelaren kan forklare reglane, men kan ikkje gi strategiske råd. Kan eg ha telefonen på bordet? Ja. Telefonen kan liggje på bordet dersom han ikkje er i vegen eller dekkjer kort eller sjetongar. Du kan bruke telefonen mellom hender eller etter at du har kasta korta. Du skal ikkje bruke han medan du har ei levande hand eller til å få hjelp, rekne odds, søkje etter strategi eller dele informasjon om spelet. Korleis fungerer Pubpoker sitt fargebyte? Når ein liten valør blir fjerna, blir den samla verdien veksla for kvar spelar. Ein eventuell rest blir runda opp til den minste valøren som framleis er i spel. Døme: Dersom 100-sjetongane blir fjerna og 500 er minste valør som står att, blir 1 200 veksla til 1 500. Sit & Go for spelarar som er slått ut Når det blir ledige bord, arrangerer vi gratis Sit & Go-turneringar for spelarar som er slått ut av hovudturneringa. Skriv namnet ditt på ventelista dersom du ønskjer å delta. Ein Sit & Go består normalt av 7–9 spelarar. Den første turneringa startar vanlegvis når det første bordet blir ledig, ofte om lag éin til to timar etter starten på hovudturneringa. Sit & Go kan starte fortløpande gjennom kvelden så lenge det er nok spelarar, ledig bord og nødvendig utstyr. Hovudturneringa har alltid prioritet dersom bord eller utstyr framleis trengst der. Kvar spelar får normalt 10 000 i startstack: 7 sjetongar à 1 000 4 sjetongar à 500 10 sjetongar à 100 Det er normalt fritt seteval. Spelarane organiserer turneringa sjølve, deler kort og sørgjer for at dealerknappen flyttar éin plass med klokka etter kvar hand. Dei vanlege Pubpoker-reglane i dette dokumentet gjeld også for Sit & Go. Blinds og turneringsklokke finn de på pubspill.no/timer. Ein telefon kan brukast som felles turneringsklokke, men skal då berre brukast til å vise eller styre klokka – ikkje til pokerstrategi eller hjelp under spelet. Sjetongane høyrer berre til den aktuelle Sit & Go-turneringa og kan ikkje overførast til hovudturneringa, ein annan turnering eller ein annan spelar. Siste Sit & Go skal normalt ikkje starte etter kl. 23.00, og aldri seinare enn éin time før serveringsstaden stengjer. Eventuell premie blir opplyst før start. Premien kan til dømes vere ein ølbong eller eit lodd i ei trekking om finalebillett i den ordinære serien. Ved feil eller usemje skal spelet stoppast og turneringsleiinga tilkallast.